साफ महिला च्याम्पियनसिप २०२४ अन्तर्गत बुधबार हुने नेपाल र बंगलादेशबीच फाइनल खेलको टिकट विक्रीमा एन्फाले तत्कालका लागि रोक लगाएको छ ।
त्रिपुरेश्वरको दशरथ रङ्गशालामा भोलि बेलुका साढे ६ बजे हुने नेपाल र बङ्गलादेशबीचको फाइनल खेलको टिकट अर्को सूचना नआएसम्मका लागि स्थगित भएको एन्फाले जनाएको छ । साथै एन्फाले दर्शकहरूलाई पनि टिकट खरिद नगर्न आव्हान गरेको छ।
आइतवार भएको दोस्रो सेमिफाइनलअन्तर्गत नेपाल र भारतबीचको खेलमा एन्फासँगको सम्झौता विपरीत रंगशालाको क्षमताभन्दा बढी टिकट विक्री गरेको आरोप एन्फाको छ। क्षमताभन्दा बढी टिकट विक्री गर्दा दर्शकको सुरक्षा हिजो चुनौती नै बनेको थियो।
माउण्ट एभरेष्ट स्पोर्टस एण्ड इभेन्ट्स प्रा.लि.सँग सत्यतथ्य बुझ्ने काम भइरहरको पनि एन्फाले जनाएको छ। यसपछि एन्फाले अर्को सूचना जारी गर्ने बताएको छ ।
साथै यो सूचनालाई वेवास्ता गर्दै टिकट विक्री वितरण गरी कुनै समस्या आएमा एन्फा जवाफदेही नहुने पनि विज्ञप्तीमा स्पस्ट पारेको छ । एन्फाले प्रतियोगिता अगाडि माउण्ट एभरेष्ट स्पोर्टस एण्ड इभेन्ट्स प्रा.लि. लाई ८० लाखमा टिकटको अधिकार उपलब्ध गराएको थियो ।
आज एन्फामा भएको छलफलमा टिकट बढी बिक्री गरेको विषयमा माउण्ट एभरेष्ट स्पोर्टस एण्ड इभेन्ट्स प्रा.लिलाई स्पष्टीकरण सोधिएको छ । मंगलबार विहान १० बजेसम्म जवाफका लागि समय दिइएको एन्फा प्रवक्ता सुरेश शाहले जानकारी दिए ।
रङ्गशालाको अवस्था र दर्शको सुरक्षालाई मध्यनजर गरेर भीआईपीतर्फ १५ सय र साधारणतर्फ ११ हजार टिकट विक्री गर्न एन्फाले निर्देशन दिएको थियो । तर सिट क्षमताभन्दा टिकट र पास बढी विक्री वितरण भएपछि दर्शक व्यवस्थापन गर्न कठिन भएको थियो । कतिपय दर्शकले टिकट काटेपनि खेल हेर्न पाएका थिएनन् भने रंगशालामा हिड्ने ठाउँ पनि थिएन ।
